Carnaval Vath Vielha

L'oppidum de Bòrdas

Qu'ei un poei avançat deu Bòsc de Bòrdas, de 90 m de denivelacion, capsús « Las Artigas », enter la D.215 e la D.212, plan plaçat a l'entrada de la Vath-Vielha. Aucupat au mens despuish l'Atge deu hèr, la mota, au sud-oèst e au nòrd-èst, profieita de penents naturaus rabents. Sus los autes costats que s'i troban varats. La plaça qu'avè ua dobla entrada protetjada de terrèrs. A l'opausat, que s'i arremarca ua proteccion suplementaria, en forma de mieja lua.

Ua campanha de recèrcas e cavadas, miada en 1974, qu'a permés de trobar tròç d'anfòras romanas, en grana quantitat datadas deus sègles II e I abans JC e donc abans l'aucupacion romana. Aquèra vaishèra que serviva a guardar lo vin, çò qui'ns deisha a pensar que la cauçada tota pròcha, aperat uei « Camin d'Enric IV », esté utilisada tà'u comèrce enter Roma e lo nòrd de l'Espanha.

En Gasconha, los oppidums que portan noms hèra divèrs : Casterar, Poei, Turon (Turonet), Tuc (Tuquet, Tucon), Terruc (Terrucon, Terrucòla), Mota (Motàs, Moteta)...